ب مليو نه ها سالا بشتي روزا قيا مه تئ................................من ژ نشكه‌كێڤه ديت؛ فريشته‌يه‌ك هات ده‌ف من، ب ده‌نگه‌ك خوه‌ش و نازك گۆت:
- ببۆره، دێ ته دوباره ڤرێكن ژيانێ، لێ جاره‌ك دي تو ژدايكنابي، دێ چييه دونيايه‌كێ نه وه‌هايه وه‌كي ته ديتي، ب ته‌مامي يا هاتي گۆهۆڕين، ژبه‌ر كو مرۆڤ تێدا ناژين و ئه‌گه‌رێ زڤڕاندنا ته ئه‌وه؛ تو ده‌مژمێره‌كێ به‌ري مرنا خوه يێ مري.
- تو راست دبێژي ده‌ما...
- نه‌بێژه "تو راست دبێژي" ژبه‌ركو فريشته نه‌وه‌يييان نابێژن.
- ببۆره، ده‌مێ ئه‌ز ل ژيانێ و رۆحا من ژ له‌شێ من ده‌ردچوو، ده‌نگه‌ك دهات گوهێن من و دگۆت: نه ئه‌وه... نه ئه‌وه... برايێ وي يه.
به‌لێ من نه‌ڤێت خوينێ ببينم، ئه‌زێ ژ ديتنا خوينێ تێربوويم، من نه‌ڤێت گوله دوباره سينگێ من كون كون بكن.
- نه تو خوينێ نابيني، ژبه‌ركو تو مرۆڤان نابيني، جيهانه‌ك دي يه و هنده‌ك زينده‌وه‌رێن دي تێدا دژين، هه‌ر ئه‌و دونيايه ئه‌وا تو ژێ هاتي، لێ ب ته‌مامي يا هاتييه وێرانكرن و ب ره‌نگه‌ك جوانتر يا دروست بووي، دێ هێزا ترسێ ل سه‌ر ته ڕاكن دا تو نه‌ترسي چونكو تو دێ هنده‌ك ديمه‌نان بيني د ژيانا ته دا ب تنێ د چيرۆكێن ئه‌فسانه‌يي دا دهاتن خواندن. دێ ره‌نگێ ته و وان وه‌كو ئێك بت، لێ د ناخێ خوه‌دا تو مرۆڤه‌ك ته‌مامي. به‌لێ ئه‌م ته ب تنێ ڤرێناكن، فريشته‌يێن ل سه‌ر مللێ ته ژي دێ دگه‌ل ته بن، به‌ري تو بچي فه‌رموو ڤي لاپه‌ري ئيمزا بكه .
دگه‌ل ئاخفتنا وي، لاپه‌ره‌ك ژ نه‌بوونێ هاته ئافراندن، ده‌ستێ من يێ راستێ بوو پێنووس و يێ چه‌پێ لاپه‌ر گرت و ب ڤي ره‌نگي چه‌ند رێزك هاتبوون نڤيسين.
نابت ل وێ ژيانێ ده‌نگێ خوه بلند بكي، نابيت بگري ژبه‌ركو چ بوونه‌وه‌ران گوه ل ده‌نگێ گري نه‌بوويه، دووماهيك خال نڤيسي بوو؛ نابت ب هيچ ره‌نگه‌كێ شوونوارێن ته ل وێ جيهانێ بمينن.
من ل بنێ لاپه‌ري ئيمزاكر، لاپه‌ر وه‌كو به‌رێ نه‌ما ل پێش چاڤێن من، بايه‌ك ژ پشت من هات، د ده‌مه‌ك كێم ده، من خوه ل جهه‌كێ ديت، ب ته‌مامي نه وه‌ك چ جهان، بێهنێن خوه‌ش، دارێن سپي و بلند، خودان زمان، ده‌نگێ بلوورێ هێدي هێدي دهات گوهێن من، ل به‌ر سينگێ من ئاڤه‌ك زه‌لال دبرسقي، پێله‌ك ئاڤێ بلند بوو، من وێنه‌يێ خوه د وێ پێلێ دا ديت، من حه‌زكر خوه ماچ بكم، له‌ورا من خوه د وێنه‌يێ خوه وه‌ركر، لێ ئاڤێ ئه‌ز ژ خوه ده‌رئێخستم و گۆت: ببۆره من حه‌ز ژ ره‌نگێ ته كر، ده‌ما د من دا ده‌ركه‌تي، لێ من حه‌ز ژ بێهنا ته نه‌كر ژبه‌ركو بێهنا زينده‌وه‌ره‌كێ ژ ته دهێت كو به‌ري چه‌ند سالان تفكربوو د ناڤ من دا، خوين دڕشته به‌ر لێڤێن من، ئه‌ز ب له‌شێ خوه پيس دكرم. ئاخ چه‌ند زينده‌وه‌ره‌ك خوينڕێژ و دره‌وين بوو.
من ده‌نگه‌ك دي بهيست و گۆت:
- ده‌ستێن خوه نه‌كه چ كه‌ره‌ستێن ڤێ جيهانێ، دا نه‌زانن تو مرۆڤي.
- تو كي يي؟
- ئه‌ز فريشته‌يێ ل سه‌ر ملێ ته‌مه.
من هێدي هێدي هه‌ست ب مرۆڤبوونا خوه كر، من گه‌له‌ك زينده‌وه‌رێن وه‌كو خوه ديتن، بلند بوون و ل هنداڤا سه‌رێ من په‌ياسه دكرن، دوباره ده‌نگێ فريشته‌ي هات گوهێن من:
- ته دڤێت وه‌كي وان بلند ببي و بفڕي؟
- به‌لێ.
- داخوازێ ژ باي بكه .
من ب ده‌نگه‌ك هێدي گۆت:
- ئه‌ي با دخوازم بفڕم.
ژ نشكه‌كێڤه ئه‌ز بلند بووم و فڕيم، چه‌ند جوان بوو ده‌مێ من ل ئاسمانا به‌رێ خوه ددا ئاخێ، هه‌ر وه‌كو نه ئه‌و ئاخ ئه‌وا ل ژيانا دي من ديتي، خوه هه‌تا بالنده‌يێن وان ژي نه وه‌ك يێن مه بوون، دگه‌ل من دفڕين، هه‌ر تشت دفڕي، دار، بالنده، ئاڤ، چيا و هه‌موويان ژي شيانێن برێڤه‌چوونێ هه‌بوون، عه‌ور ، با، خوه ستێر ژي بچووك دبوون و په‌ياسه دكرن.
ده‌ما ئه‌ز دفڕيم؛ ده‌نگێ چياي دهات گوهێن من:
- هێي زينده‌وه‌رێ پيرۆز، وه‌ره سترانه‌كێ بۆ من بێژه؟
- ببۆره، ئه‌ز سترانان نزانم.
- دێ شێم دگه‌ل ته فڕم، يان تو وه‌ره دگه‌ل من په‌ياسه‌كێ بكه؟
- ئه‌ز حه‌ز ژ فڕينێ دكم، دخوازم تو دگه‌ل من بفڕي.
ئه‌م دفڕين و مه جوانييه‌ك بێ مه‌ودا ديت، بۆ من ستران دگۆتن و به‌حسا ڕۆژهه‌لاتنێ دكر. ئه‌م ل سه‌ر جهه‌كێ ڕا بۆرين، گه‌له‌ك زينده‌وه‌رێن وه‌كو من لێ هه‌بوون، له‌ورا من خواست ده‌ستووريێ ژ چيايي بخوازم و وي ژي ب كه‌يف خوه‌شي خواتر ژ من خواست.
ئه‌ز به‌ره‌ڤ وي جهي چووم، من به‌رێخوه‌دايێ ئێك ژ وان زينده‌وه‌ران يێ فێقيێ داره‌كێ دخۆت، له‌ورا من حه‌زكر دگه‌ل وي بخۆم، ده‌ما ئه‌ز نێزيكبوويم، ئه‌و داره دگه‌ل من ئاخفت و گۆت:
- تو حه‌ز دكي ئێكێ دي ژ ته دروست ببت، ته دڤێت بمري؟
- نه‌خێر.
من ديت فێقيێ خوه ژ به‌ر چاڤێن من راكر و به‌رزه‌بوو، ده‌نگه‌ك ژ سه‌ر ملێ من هات و گۆت:
- تو دزاني، هه‌ر كه‌سێ وي فێقي بخۆت، دێ ئێكێ دي ژێ چێبت؟
- من د ناخێ خوه دا كر كه‌ني و من ب ده‌نگه‌ك بلند گۆتێ به‌لێ ئه‌ز نێرم.
- دزانم تو نێري، به‌لێ ئه‌ڤ جيهانه يا بێبه‌هره ژ نێر و مێيان، ده‌ما دزانن ئێدي شيان نينن چ تشتێ نوو ل ڤێ جيهانێ زێده‌بكن و مانا وان زێده‌هي يه، دهێن فێقيێ ڤێ دارێ دخۆن، پشتي خوارنا وي فێقي، ره‌نگ و ناخێ وان دهێت گوهۆرين، ئانكو ئه‌و ب ڤي ره‌نگي سه‌فه‌را خوه يا دووماهييێ دكن.
- بوونه‌وه‌ره‌ك سه‌يره.
من ديت بايه‌ك هات و گۆت:
- ده‌مژمێرا ته ب دووماهيك هات، تو يێ ئاماده‌يي بچين؟
- دخوازم ل ڤێ ژيانێ بمينم چونكو باوه‌رناكم چ ژيان ژ ڤێ خوه‌شتر هه‌بن.
- به‌لێ ژيانه‌ك خوه‌شتر يا هه‌ي، ئه‌وا چ جاران مرۆڤ تێدا نه‌مرت.
هێدي هێدي خوه د من ئالاند و ئه‌ز به‌ره‌ڤ گۆره‌پانا مه‌حشه‌رێ برم.
ليست هناك تعليقات:
إرسال تعليق